Rusia dhe Ukraina kanë shkëmbyer sulme të reja me dronë dhe raketa, duke shkaktuar viktima dhe dëme të mëdha në të dyja anët e kufirit. Sulmet e fundit shënojnë një tjetër përshkallëzim të luftës, ndërsa të dyja palët vazhdojnë të godasin objektiva në territorin kundërshtar.
Të paktën nëntë persona janë vrarë dhe 23 të tjerë janë plagosur në sulmet ukrainase ndaj Rusisë gjatë 24 orëve të fundit, sipas autoriteteve lokale ruse, shkruan A2CNN.
Tetë viktima u raportuan në rajonin e Belgorodit, pranë kufirit me Ukrainën, ndërsa një grua humbi jetën në rajonin e Astrakhanit. Autoritetet thanë se sulmet shkaktuan gjithashtu dëme në ndërtesa dhe automjete.
Në të njëjtën kohë, sulmet ruse ndaj Ukrainës kanë shkaktuar viktima në disa rajone të vendit.
Dy persona u vranë në sulmet me dronë në qytetet Kramatorsk dhe Sloviansk, në rajonin e Donetskut. Në Sloviansk, zjarret përfshinë një treg lokal, ku 54 pavione tregtare u dogjën.
Në rajonin e Sumyt, një burrë dhe një grua u vranë në një sulm me dron gjatë natës.
Ndërkohë, një sulm në qytetin portual të Odesës dëmtoi një anije civile dhe plagosi katër persona.
Autoritetet ukrainase kanë raportuar gjithashtu dëme të konsiderueshme në infrastrukturë dhe objekte civile pas valës së fundit të sulmeve ruse.
Kievi ka intensifikuar sulmet me dronë me rreze të gjatë veprimi brenda territorit rus.
Sipas autoriteteve ruse, Ukraina lëshoi rreth 822 dronë gjatë natës së së shtunës, rreth 600 prej të cilëve dyshohet se kishin Moskën si objektiv. Autoritetet e kryeqytetit rus e përshkruan sulmin si një nga më masivet e kohëve të fundit.
Një prej objektivave të goditura ishte edhe një depo e kompanisë ruse të shitjeve online Wildberries. Ukraina pretendon se disa prej qendrave të saj logjistike përdoren për furnizimin e ushtrisë ruse.
Zëvendësshefi i inteligjencës ushtarake ukrainase, gjeneralmajor Vadym Skibitski, tha se sulmet me rreze të gjatë do të vazhdojnë, duke argumentuar se ato synojnë të dobësojnë kapacitetet logjistike të Rusisë.
Moska ka shtuar gjithashtu sulmet me raketa dhe dronë në të gjithë Ukrainën.
Kompania ukrainase e energjisë Naftogaz deklaroi se objektet e saj janë sulmuar 13 herë gjatë javës së fundit. (A2 Televizion)
A2 CNN Livestream
MUND TE LEXONI GJITHASHTU
