SHBA-ja po heq disa nga tarifat doganore prej 50% të vendosura mbi mallrat kanadeze. Shtëpia e Bardhë deklaroi të premten se po punon për të “mbrojtur prosperitetin ekonomik dhe sigurinë kombëtare të popullit amerikan”.
Përjashtimet nga tarifat mund të ndihmojnë gjithashtu kandidatët republikanë në zgjedhjet e mesmandatit, që do të mbahen më 3 nëntor, pasi shumë votues amerikanë rendisin koston e jetesës dhe presionet ekonomike ndër çështjet kryesore të shqetësimit.
Senatorja republikane Susan Collins, e cila po përballet me një garë të ngushtë në shtetin e Maine për të ruajtur vendin e saj në Senat, ishte e para që njoftoi përjashtimet. Ajo tha se ky vendim do të ndihmojë industrinë bujqësore të shtetit të saj.
Pas dështimit të bisedimeve tregtare gjatë verës, SHBA-ja dhe Kanadaja nisën një luftë tarifore në përshkallëzim, e cila ka prekur të dyja anët e kufirit.
Në një deklaratë, Shtëpia e Bardhë bëri të ditur se, duke nisur nga 30 tetori, SHBA-ja do të heqë disa produkte nga lista e mallrave kanadeze që i nënshtrohen tarifave.
Shtëpia e Bardhë tha se ky vendim pasqyron “përpjekjet e vazhdueshme të presidentit Trump për të mbrojtur punëtorët amerikanë dhe për të garantuar tregti të drejtë”, si dhe për të “kompensuar barrën dhe disavantazhet që i shkaktohen tregtisë amerikane nga trajtimi diskriminues i Kanadasë”. (A2 Televizion)
A2 CNN Livestream
MUND TE LEXONI GJITHASHTU
