Presidenti i SHBA-së, Donald Trump, paralajmëroi të enjten vonë për mundësinë e goditjes dhe shkatërrimit të urave dhe centraleve elektrike në Iran, në kërcënimin e tij më të fundit ndaj infrastrukturës së vendit.
Ushtria amerikane “nuk ka filluar ende të shkatërrojë atë që ka mbetur në Iran. Të radhës janë urat, pastaj centralet elektrike,” shkroi Trump në rrjetet sociale. Ai shtoi se udhëheqja iraniane “e di çfarë duhet bërë, dhe duhet bërë shpejt”.
Trump, i cili më herët ka dhënë afate dhe objektiva të ndryshme për luftën, deklaroi në një fjalim televiziv të mërkurën se konflikti mund të përshkallëzohet nëse Irani nuk pranon kushtet e vendosura nga Uashingtoni, duke përfshirë edhe sulme ndaj infrastrukturës energjetike dhe të naftës.
Dhjetëra ekspertë të së drejtës ndërkombëtare në SHBA nënshkruan një letër të hapur të publikuar të enjten, ku thuhet se sulmet amerikane ndaj Iranit mund të përbëjnë krime lufte. Konventat e Gjenevës ndalojnë sulmet ndaj objekteve që konsiderohen jetike për civilët.
Sipas këtyre konventave dhe protokolleve shtesë, palët në konflikt duhet të dallojnë midis “objekteve civile dhe objektivave ushtarake”, dhe sulmet ndaj objekteve civile janë të ndaluara.
“Ne do t’i godasim shumë fort në dy deri në tre javët e ardhshme. Do t’i kthejmë në epokën e gurit, aty ku e kanë vendin,” tha Trump në fjalimin e tij të së mërkurës.
Megjithëse ai deklaroi se SHBA po i afrohet përmbushjes së objektivave në Iran, Trump nuk dha një afat të qartë për përfundimin e luftës.
Lufta filloi më 28 shkurt, kur SHBA dhe Izraeli sulmuan Iranin. Teherani u kundërpërgjigj me sulme ndaj Izraelit dhe shteteve të Gjirit ku ndodhen baza amerikane. Sulmet e përbashkëta SHBA-Izrael në Iran dhe ato izraelite në Liban kanë shkaktuar mijëra viktima dhe kanë zhvendosur miliona njerëz.
Konflikti ka rritur gjithashtu çmimet e naftës dhe ka tronditur tregjet globale. Mesazhet e paqarta të Trump deri tani nuk kanë arritur të qetësojnë frikën lidhur me ofensivën më të madhe ushtarake të SHBA-së që nga Lufta e Irakut. (A2 Televizion)
A2 CNN Livestream
MUND TE LEXONI GJITHASHTU
