Rama dhe Kurti takohen me përfaqësuesit e biznesit: Do të lehtësojmë procesin në dogana

Kryeministri Edi Rama, së bashku me kreun e qeverisë së Kosovës, Albin Kurti, zhvilluan një takim me përfaqësues të biznesit.

Rama deklaroi se është punuar intensivisht nga të dyja administratat për të kontrolluar zbatimin e marrëveshjeve të bëra në këto vite: “Aktet e përbashkëta me administratat tona doganore reduktojnë koston për bizneset e Kosovës, që tranzitojnë përmes Shqipërisë. Besoj që marrëveshja për lehtësimin e tregtisë mes palëve do të bëjë lehtësimin e të gjithë procesit në doganë për hyrje-daljen e mallrave. Mallrat, fruta-perime do të kenë lehtësim drastik”.

Ndërkohë, kryeministri Albin Kurti tha se është me rëndësi që të hiqen të gjitha barrierat dhe të ketë një mbështetje më të lartë në fushën e inovacionit: “Tani është koha që dy shtetet të bëjnë më shumë, të kemi zotime për heqjen e të gjitha barrierave tarifore. Është thelbësore të mundësojmë lëvizjen e lirë të punëtorëve. Ne jemi zotuar që të gjitha barrierat do të hiqen për punëtorët që vijnë nga Shqipëria”. (A2 Televizion)