Kryeministri holandez përshëndeti nismën e Ballkanit të Hapur të ndërmarrë nga Shqipëria, Serbia dhe Maqedonia e Veriut. “Vendimi i vendeve të Ballkanit Perëndimor për të lehtësuar lëvizjen e lirë mes shteteve është një rast për të provuar tregtinë e lirë, prandaj e kuptoj që duan ta bëjnë këtë”, tha ai në konferencën për mediat në Tiranë.
Rutte komentoi edhe krizën në Bosnjë-Hercegovinë, të përshkallëzuar në javët e fundit pas propozimit të udhëheqësit serb të Bosnjës, Milorad Dodik, për krijimin e një ushtrie serbe brenda federatës boshnjake. “Jam shumë i shqetësuar për Bosnjë-Hercegovinën. Po punojmë shumë për të stabilizuar situatën dhe për të parandaluar ndarjen e sistemit politik në atë vend. Në rajon na duhen shembuj të liderëve si Rama, i cili është i respektuar në të gjithë rajonin dhe është aktiv për t’u siguruar që rajoni të mbetet sa më i qëndrueshëm”, tha ai.
Nga ana e tij, kryeministri Rama u shpreh se Bosnja meriton vëmendje maksimale. “Ato që shohim në rajon këto ditë, nuk janë shenja të mira, as në Bosnjë, as në Malin e Zi, as në Maqedoninë e Veriut dhe as në kufirin mes Kosovës dhe Serbisë. Ato janë arsye për të shtuar forcat për të rritur bashkëpunimin. Prandaj Ballkani i Hapur është një mekanizëm që i shërben këtij qëllimi”, tha Rama. “Nuk besoj se jemi pranë shpërthimit të një konflikti, por besoj që këto janë simptoma të rrezikshme që duhen marrë me seriozitet”. (A2 Televizion)
A2 CNN Livestream
MUND TE LEXONI GJITHASHTU
