Fondi Shqiptar i Zhvillimit shpalli sot tenderin për projektin e ndërhyrjeve në bregun perëndimor të lumit Buna, që do të transformojë dhe rikualifikojë zonën përgjatë rrugës që lidh Shkodrën me Shirokën.
Ky projekt ka për qëllim përmirësimin e kushteve infrastrukturore dhe estetike të zonës, duke e shndërruar atë në një qendër të re turistike të veriut të Shqipërisë. Ndërhyrja do të përfshijë një sërë objektivash të rëndësishëm, mes të cilëve urbanizimi i zonës, ndërtimi i pedonales buzë lumit, dhe përmirësimi i infrastrukturës rrugore.
Po ashtu, plani parashikon krijimin e shtigjeve që lidhin lumin e Bunës me malin e Taraboshit, si dhe ndërtimin e një shkallareje që do të mundësojë ngjitjen drejt majës së malit.
Në fund të kësaj shkallareje, vizitorët do të mund të shijojnë një pamje panoramike të mrekullueshme nga një ballkon që do të ndërtohet.
Ky projekt ka gjithashtu për qëllim ruajtjen dhe promovimin e trashëgimisë kulturore të zonës.
Në hyrje të Liqenit të Shkodrës, zona e sheshit rekreativ do të shndërrohet në një pikë të rëndësishme për turistët dhe banorët, me një pergola metalike që do të kujtojë historinë e thertores së dikurshme të qytetit.
Ky shesh do të jetë i përshtatshëm për fluksin e besimtarëve që vizitojnë xhaminë lokale, ndërkohë që zona do të ofrojë mundësi për pushim dhe argëtim.
Sipas autoriteteve, ky projekt është një mundësi e shkëlqyer për të zhvilluar turizmin në këtë pjesë të Shqipërisë, duke ofruar një përvojë unike që lidh natyrën, historinë dhe kulturën e Shkodrës.
Fondi limit për realizimin e projektit është 374,8 milionë lekë, dhe financimi është parashikuar për periudhën 2025-2027.
Afati për dorëzimin e ofertave për këtë projekt është 27 gushti, në orën 11:00, dhe pritet që puna të përfundojë brenda një periudhe 8-mujore.
Me realizimin e këtij projekti, Shkodra do të konsolidojë pozitat e saj si një destinacion turistik i rëndësishëm, duke ofruar vizitorëve mundësinë për të eksploruar bukuritë natyrore dhe historike të qytetit dhe zonave përreth.
Plaza e hyrjes në Liqenin e Shkodrës
Hapësira përballë urës së këmbësorëve mbi lumin Buna do të shndërrohet në një shesh rekreativ. Xhamia do të rrethohet me një hapësirë pedonale, e cila do të jetë e përshtatshme për të përballuar fluksin e besimtarëve gjatë shërbesave. Pjesa verilindore e sheshit do të përmbajë një pergolë metalike, e cila do të shërbejë si një monument në kujtesë të thertores së dikurshme të qytetit, që ndodhej në këtë zonë. Brenda pergolës do të krijohet një hapësirë për pushim, e pajisur me një bar kafe.
Parku i hyrjes për në malin e Taraboshit
Mali i Taraboshit ka një lidhje të ngushtë me historinë e qytetit të Shkodrës. Një nga objektivat kryesore është rikthimi i vëmendjes tek ky mal historik. Projekti parashikon lidhjen e malit me lumin e Bunës përmes një shkallareje zig-zag. Në fund të shkallares, do të ndërtohet një ballkon panoramik, që do të ofrojë vizitorëve një pamje të plotë të zonës.
Ballina ujore
Ballina ujore është zona e vendosur përgjatë lumit Buna dhe ka një rëndësi strategjike të madhe. Ajo do të shndërrohet në një atraksion turistik ikonik dhe do të kontribuojë në promovimin e imazhit të Shkodrës si një kryeqytet modern dhe kulturor me një histori të pasur, lidhur ngushtësisht me qytetin dhe kalanë e Rozafës.
Rruga automobilistike
Projekti përfshin edhe ndërhyrje në rrugën automobilistike që lidh Shkodrën me Shirokën. Historikisht, Shiroka është konsideruar një lagje e Shkodrës, dhe kjo rrugë ka qenë nyja lidhëse e lagjes matanë liqenit. Konceptimi i rrugës është bërë në përputhje me parametrat e rrugëve urbane, e pajisur me dy korsi për automjete, trotuare dhe korsi të dedikuara për biçikleta. Ky aks do të marrë një pamje të re dhe më moderne. (A2 Televizion)
A2 CNN Livestream
MUND TE LEXONI GJITHASHTU
