Kryeministri Edi Rama ka uruar të gjithë nxënësit që nisin këtë vit të ri shkollor. Në një postim në rrjetet sociale, ai u uron suksese dhe nxënësve që ulen për herë të parë bankat e shkollës.
“Mirëmëngjes dhe duke ju uruar suksese 345 mijë nxënësve që ulen sot në bankat e shkollave, dhe ata 26,500 nxënës të klasave të para, që nisin sot rrugën e bukur të dijes, ju uroj një javë të mbarë!”, shkruan Rama.
Rreth 345 mijë nxënës, 31 mijë mësues nisin vitin e ri shkollor 2025-2026. Në bankat e shkollës do të ulen për herë të parë 26 500 nxënës, një numër në ulje ky krahasuar me një vit më parë ku më klasën e parë u regjistruan 28 mijë nxënës.
Për 236 mijë nxënës tekstet janë falas. Këtë vit janë 30 shkolla të reja dhe të rehabilituara, 340 laboratorë smart dhe kurrikulë e re në klasat e IV, si edhe do të rritet numri i oficerëve të sigurisë dhe punonjësve socialë në shkollë me qëllim mbrojtjen e fëmijëve.
Transporti falas do të ofrohet për 38 mijë nxënës dhe 12 mijë mësues. Po ashtu, janë të disponueshme 3,500 bursa për nxënësit që kanë nevojë për mbështetje financiare.
Ministria e Arsimit ka njoftuar se këtë vit është përforcuar mbështetja për nxënësit me aftësi të kufizuara, me 2,260 mësues ndihmës, 150 më shumë krahasuar me vitin e kaluar.
Kujtojmë që ky vit i ri shkollor nis me rënie të theksuar të numrit të nxënëseve në qarqet kryesore të vendit, Korçë, Gjirokastër dhe Shkodër, ku shumë shkolla rrezikojnë të mbyllen. (A2 Televizion)
A2 CNN Livestream
MUND TE LEXONI GJITHASHTU
