Kreu i Nismës Thurje dhe pjesë e koalicionit “Shqipëria Bëhet”, Endrit Shabani, i kërkon Celibashit që të njohë të gjitha dorëheqjet e kandidatëve që vijnë nga radhët e kësaj partie dhe të nisë procedurat për shpërndarjen e mandateve. Me anë të një letre drejtuar kryekomisionerit Shtetëror të Zgjedhjeve, Shabani kërkon shpalljen sa më shpejt të rezultatit të zgjedhjeve të 11 majit dhe shpërndarjen e mandateve sipas vullnetit të zgjedhësve
“Kërkoj nga KQZ-ja që të njohë dorëheqjet e dorëzuara me datë 11 Maj 2025 nga 46 kandidatët e listës së mbyllur të koalicionit tonë, të cilët me vullnet të plotë deklaruan se nuk synojnë të marrin mandatin e deputetit”, lexohet në letrën e Shabanit.
Pas debatit të ngritur mbi vlefshmërinë e dorëheqjeve të kandidatëve në listën e mbyllur, pas deklaratës së një dite më parë të kandidatit Zeqir Kordhoni, Endri Shabani sqaroi më herët në A2 CNN se “të gjithë ata që kanë hyrë në listë të mbyllur kanë hyrë me zotim për të dhënë dorëheqjen. Kjo është thënë publikisht dhe është lehtësisht e verifikueshme në çdo kohë,” deklaroi Shabani.
Letra e Endri Shabanit
Datë: 11 Korrik 2025
Lënda: Kërkesë për njohjen e dorëheqjeve të dorëzuara në 11 Maj 2025
Drejtuar: Komisionit Qëndror të Zgjedhjeve, kryetarit Ilirjan Celibashi
I nderuar Z. Komisioner,
Në emër të Partisë Nisma Thurje dhe Koalicionit Nisma Shqipëria Bëhet, ju drejtohem për të kërkuar zyrtarisht që Komisioni Qendror i Zgjedhjeve të shpallë sa më shpejtë rezultatin e zgjedhjeve të 11 Majit 2025 dhe të shpërndajë mandatet sipas vullnetit të zgjedhësve.
Kanë kaluar dy muaj nga dita e zgjedhjeve dhe këto vonesa po krijojnë hapësira për lojëra politike, të cilat po delegjitimojnë procesin duke u kthyer në telenovelat e verës.
Gjithashtu, kërkoj që KQZ-ja të njohë vullnetin e zgjedhësve të koalicionit Nisma Shqipëria Bëhet, ku mbi 54,000 vota u dhanë drejtpërdrejt për kandidatët e listës sonë të hapur. Këto nuk janë thjesht shifra, por një shprehje e qartë e vullnetit të qytetarëve për të zgjedhur direkt përfaqësuesit e tyre në parlament.
Më lejoni t’ju rikujtoj se ky garim me lista të hapura, erdhi në kushtet kur partitë e vjetra u bënë bashkë për të na imponuar një kod zgjedhor anti-demokratik. Ne e sfiduam këtë përpjekje duke e çuar çështjen në Gjykatën Kushtetuese, dhe më pas duke u detyruar të përdornim një artificë, e cila gjithsesi është brenda hapësirës që na jep ligji.
Prandaj, për të vendosur një standard demokratik në Shqipëri, do duhet të krijohen kushte kur partitë politike të garojnë me lista të hapura. Dhe për këtë qëllim, kërkoj nga KQZ-ja që të njohë dorëheqjet e dorëzuara me datë 11 Maj 2025 nga 46 kandidatët e listës së mbyllur të koalicionit tonë, të cilët me vullnet të plotë deklaruan se nuk synojnë të marrin mandatin e deputetit.
Dua t’ju rikujtoj se veprimet tona janë marrë në bashkërendim të plotë me KQZ-në. Pikërisht për këtë arsye insistojmë që KQZ-ja të veprojë në përputhje me praktikën e mëparshme të tij, ku dorëheqjet e paraqitura janë njohur pa pengesa apo interpretim selektiv. Çdo devijim nga ky standard në rastin tonë do të përbënte jo vetëm shkelje të parimit të barazisë, por do të cenonte besueshmërinë e institucionit.
Prandaj, i bëjmë thirrje Komisionit Qendror të Zgjedhjeve që:
• Të njohë zyrtarisht dorëheqjet e 46 kandidatëve të listave të mbyllura të paraqitura në datë 11 Maj 2021, në përputhje me vullnetin e kandidatëve;
• Të vijojë me procedurat për t’i dhënë mandatin kandidatit të renditur i pari në listën e hapur, në përputhje me ligjin dhe normat demokratike;
• Të mos lejojë asnjë manipulim apo vonesë që do të përbënte mungesë respekti ndaj 65,000 qytetarëve që i besuan koalicionit tonë dhe kandidatëve tanë.
Besojmë se nën drejtimin tuaj, KQZ do të qëndrojë në lartësinë e misionit të saj për të mbrojtur procesin demokratik dhe për të mos lejuar asnjë devijim nga vullneti i votuesve.
Me respekt,
Endrit Shabani (A2 Televizion)
A2 CNN Livestream
MUND TE LEXONI GJITHASHTU
