Për dy ditë Pogradeci kthehet në qendër të vëmendjes politike ku kryeministri Edi Rama zhvillon takime si me drejtuesit politikë të partisë, ashtu edhe ministrat e kabinetit qeveritar për të kaluar në sitë një nga një punën e secilit.
Gazetari i A2 CNN, Artin Halili raporton se dita e parë e takimit do t’i kushtohet çështjeve politike dhe diskutimit të dokumentit të “Besës”, ndërsa dita e dytë do të fokusohet te llogaridhënia e ministrave për rezultatet e arritura.
Mbledhjet do të zhvillohen në ambientet e jashtme të vilave qeveritare, nën masa të shtuara sigurie.
Kryesocialisti e nis retreat të dielën me punët e partisë të parën dhe të Parlamentit. Në 11:30 drejtuesit politik dhe kryetarët e komisioneve parlamentare do të marrin vërejtjet dhe porositë nga kryetari. Jeta parlamentare me nisjen e sesioni politik nis me sfidën e reformës territoriale, për të cilën socialistët po hasin në rezistencë e të gjithëve. Por nuk është vetëm kjo, pasi në “lojë” është edhe reforma elektorale apo ligjet që duhet të miratohen si detyrim me përafrimin e legjislacionit tonë me atë të BE.
Ndërsa Parlamenti do të nisë në mes protestave, partia duhet të angazhohet përzgjedhjet e ardhshme lokale, ku Edi Rama dhe ekipi i tij synojnë të mos lëshojnë pushtet në asnjë bashki. Për këtë arsye drejtuesit politik do të duhet të dorëzojnë matjet e tyre të opinion publik sidomos në atë zona ku janë shkrirë njësitë vendore. Dhe gjithashtu të vendosen parimet se si do të jetë përzgjedhja e kandidatëve të PS për kryetar bashkie, edhe pse disa emra nën zë e pranojnë që e kanë rikonfirmuar besimin e Ramës.
Të hënën përpara kreut të qeverisë do të dalin ministrat e kabinetit, edhe pse disa prej tyre do të duhet të qëndrojnë dy ditë për shkak se mbajnë edhe postin e drejtuesit politik. Analiza e punës së bërë edhe objektivat e vitit të dytë të mandatit të katërt do të jenë në fokus të kësaj mbledhje.
Të majtët do të shkojnë në Pogradec jo vetëm të përgatitur me analizën e dikastereve, zonave apo komisioneve që drejtojnë, por do të marrin me vete edhe ankthin nëse do të arrijnë të dalin nga kjo mbledhje me rikonfirmimin e posteve të tyre. Pa harruar Besën dhe Praninë besnike, dy dokumentet që Rama “ushqeu” të tijtë dhe opinionin publik gjatë kohës që pushonte në jug.
(A2 Televizion)
A2 CNN Livestream
MUND TE LEXONI GJITHASHTU
