Pas 24 vitesh mungesë, Barcelona dhe Real Oviedo u përballën sërish në La Liga, me katalanasit që triumfuan 3-1 në stadiumin “Carlos Tartiere”, duke i shkaktuar vendasve disfatën e pestë në gjashtë ndeshjet e para të sezonit pas ngjitjes nga Segunda División.
Të mbështetur nga një atmosferë elektrizuese, vendasit nisën fuqishëm me katër goditje këndi radhazi, por shpejt Barcelona mori kontrollin e topit dhe krijoi rrezik me Marcus Rashford, i cili testoi dy herë portierin Aarón Escandell. Oviedo rezistoi dhe në minutën e 34-t përfitoi nga një gabim i rëndë i portierit Joan García: Alberto Reina realizoi nga 40 metra një gol spektakolar, shkruan A2 CNN.
Fillimi i pjesës së dytë pa vendasit më agresivë, por në minutën e 55-të Eric García barazoi pas një aksioni të bukur. Ky gol i dha vrull Barcelonës, e cila në minutën e 70-të përmbysi rezultatin me një goditje perfekte me kokë nga Robert Lewandowski, i sapofutur në fushë.
Me Oviedon të detyruar të sulmonte, u hapën hapësira për katalanasit. Polaku ishte pranë golit të dytë, ndërsa në minutën e 88-të Ronald Araújo vulosi fitoren me një tjetër goditje të fuqishme me kokë.
Barcelona mori kështu fitoren e shtatë radhazi në ndeshjet e luajtura të enjten, duke regjistruar 12 gola të shënuar dhe vetëm një të pësuar në tre sfidat e fundit të kampionatit. (A2 Televizion)
A2 CNN Livestream
MUND TE LEXONI GJITHASHTU
