Skandal nga Novak Djokovic. Pasi dështoi në US Open, ku nuk arriti të fitonte titullin Grand Slam, numri një i tenisit botëror kaloi disa ditë pushimi në Bosnjë. 34-vjeçari u fotografua me Milan Jolovic, ish-komandantin e “Ujqërve të Drinit”, njësia e ushtrisë së Beogradit, që mori pjesë në gjenocidin e Srebrenicës, në korrik 1995.
Gjatë atyre ditëve, ushtria serbe vrau rreth tetë mijë myslimanë të Bosnjës, duke i hedhur trupat e tyre në varre të përbashkëta. Pas ngjarjes makabre, Jolovic u cilësua si legjendë nga bashkëkombësit e tij, teksa mori famë edhe sepse i shpëtoi jetën gjeneralit Ratko Mladic, i cili është i burgosur për gjenocid dhe krime lufte.
Fotografia që akuzon tenistin u publikua nga sajti boshnjak Fakta, e cila akuzon Djokovic se ka marrë pjesë edhe në një dasmë përkrah Milorad Dodik, anëtarin serb të presidencës së Bosnjë-Hercegovinës, që njihet për qëndrimet e tij mohuese rreth masakrës.
Kjo nuk është hera e parë që Djokovic përfshihet në çështje nacionaliste. Në vitin 2020, pas fitores në ATP Cup në Sidnei, bashkë me shokët e ekipit ai këndoi “Vidovan”, në rreshtat e së cilës janë edhe fjalët “Askush nuk mund të ma marrë Kosovën”. Për atë episod, ambasadori i Kosovës në Bullgari shkroi se “nuk është rastësi që Novak është një prej kampionëve të tenisit më pak të dashur në histori”. (A2 Televizion)
A2 CNN Livestream
MUND TE LEXONI GJITHASHTU
