Vasili i përgjigjet PS-së: “Drafti” ynë është “5 qershori”

Në mungesë të një kompromisi, i cili mesa duket është prishur sidomos në javët e fundit, këtë të mërkurë mazhoranca e ka çuar një hap përpara këtë proces, ku konferenca e kryetarëve të grupeve parlamentare vendosi që ndryshimet në kodin zgjedhor të kalojnë më 1 tetor në Kuvend.

Por cilat do të jenë hapat e ardhshme që do të ndjekë opozita jashtë parlamentit? Për t’i dhënë përgjigje kësaj pyetjeje dhe të tjerave, ishte i ftuar në A2 nënkryetari i Lëvizjes Socialiste për Integrim, Petrit Vasili.

“Ne kemi depozituar letrën që i drejtohet OSBE/ODIHR-it, në dakordësi të plotë me marrëveshjen e 14 janarit dhe 5 qershorit. Ne nuk kemi bërë as më shumë e as më pak duke respektuar marrëveshjen e 14 janarit. Kjo marrëveshje thotë se projekti përfundimtar, i dakordësuar mes palëve, sipas këtij dokumenti, do të miratohet nga kuvendi, ku shumica angazhohet të mos kryejë ndryshime në komision dhe në seancën plenare. Opozita është 100% korrekte në çdo angazhim që ka marrë dhe merr, ashtu siç është edhe për 5 qershorin, të cilit nuk i lëviz asnjë pikë dhe s’ka kërkuar t’i ndryshohet asnjë pikë. Përballë shqiptarëve ka dy alternativa sot. Një palë që gënjen në mënyrë sistematike dhe një palë tjetër, e cila është opozita, që u qëndron deri në fund të marrëveshjeve edhe pse mund të mos e lumturojnë shumë.

Ne nuk kemi shpikur artifice. Po veprojmë po në atë frymë të nënshkruar po nga e njëjta palë gënjeshtare. Ne kemi nënshkruar 5 qershorin, të mbështetur edhe nga ndërkombëtarët dhe nuk i kemi lëvizur asnjë presje. Sa u takon krizës, ai që ndryshon në mënyrë të njëanshme rregullat e lojës, për të cilët bota thotë se nuk mund të ndryshohen, është ai në hall apo është opozita në hall? Halli i humbjes e bën të shkelë kushtetutën e gjithçka tjetër. Drafti ynë është 5 qershori, shumë i qartë dhe i votuar nga të dyja palët. Ne po vëmë në tavolinë konsensualitetin e përbashkët, ata po vënë të njëanshmen. Kush ka të drejtë këtu? Sigurisht që ne kemi të drejtë”. Cili do të jetë veprimi i opozitës nëse mazhoranca do të kalojë ndryshimet në kodin zgjedhor pa dakordësi? “Kush kërkon dhe i del për zot të marrë përgjegjësi kaq të rëndë do të përballet me pasojë shumëformëshe. Asnjë nuk do të rrijë me duart lidhur dhe të shikojë sesi një grup horrash politik rrëmben vendin, rrëmben kushtetutën, për të mbushur xhepat edhe disa ditë më shumë”. (A2 Televizion)