Basha: Ndërkohë që bën sikur ndihmon, qeveria po programon më shumë taksa

Kryetari i Partisë Demokratike, Lulzim Basha, me anë të një statusi në Facebook, thekson se “Edi Rama vazhdon të tallet me qytetarët me gjoja paketa shpëtimi”, duke iu referuar paketës së rezistencës sociale.

“Është e njëjta skemë siç bëri në kohën e pandemisë, ku shumica dërrmuese e shqiptarëve u zhytën në mjerim. Qeveria ka parashikuar të shpërndajë lëmoshë te grupe të kufizuara, që po mbijetojnë, kur në fakt rritja e çmimeve prek të gjitha shtresat dhe do të zhysë në varfëri qindra mijëra familje. Zgjidhje ka. Ia kemi propozuar kohë më parë ku i kërkuam të marrë masa. Sepse shqiptarët janë aq të varfër sa nuk i përballojnë dot kostot shtesë për të përmbushur nevojat bazë. Mjafton të shohësh vendet fqinje për të kuptuar se ka zgjidhje që ndihmojnë të gjithë qytetarët. Kuvendi i Maqedonisë së Veriut ka miratuar ligjin për uljen e akcizës për karburantet dhe Tatimit mbi Vlerën e Shtuar nga 18 në 10 për qind. Po kështu ka vendosur për uljen e TVSH-së për ushqime bazë nga 5 në 0 për qind”, shkruan Basha.

“Por ndërkohë që bën sikur po ndihmon qytetarët, në këtë kohë krize, qeveria po programon më shumë taksa; do të rikthejë taksën për Biznesin e Vogël dhe një sërë taksash të tjera që do ta rëndojnë edhe më shumë gjendjen. Me lëmoshë nuk zgjidhet kriza, ajo vetëm thellohet më shumë”, shtoi kreu i PD-së. (A2 Televizion)