Berisha pas votimit: PD do të dalë më e bashkuar nga këto zgjedhje

Partia Demokratike do të dalë më e bashkuar nga këto zgjedhje. Këtë mesazh përcolli lideri historik i PD, Sali Berisha pasi hodhi votën e tij në zgjedhjet për kreun e ri demokrat. Në një deklaratë për mediat ai u bëri thirrje demokratëve që të votojnë masivisht në këto zgjedhje dhe shprehu bindjen se pavarësisht rezultatit të gjithë kandidatët do të punojnë për PD dhe vendin.

“Mesazhi im është të marrin pjesë në votim. Po zhvillohet një proces që duhet ta ushtrojnë. Besoj se,  pasi kam shprehur qëndrimin tim për parakohësinë e saj kjo do ta nxjerrë më të bashkuar PD. Kandidatët kanë shprehur pikëpamjet e tyre dhe janë zotuar se pavarësisht rezultatit do të vazhdojnë përpjekjet për PD dhe vendin”.

I pyetur se nëse i qëndron deklaratave për rikthim të mundshëm në PD, Berisha u përgjigj se është konsistent ndaj deklaratave të tij; “Unë jam konsistent ndaj deklaratave të mia”. (A2 Televizion)