Lehtësimi i masave kufizuese, sezoni turistik veror dhe depërtimi në territorin e vendit i variantit Delta të koronavirusit, duket se kanë ndikuar në rritjen e numrit të infektimeve gjatë muajit korrik.
Sipas të dhënave nga Ministria e Shëndetësisë, 558 qytetarë u prekën nga Covid-19 gjatë muajit të shkuar, duke “prishur” trendin në rënie të rasteve të reja që ishte krijuar gjatë muajve maj dhe qershor.
Numri i personave aktivë me koronavirus u rrit me tetë herë gjatë muajit të shkuar. Nga 53 të prekur që ishin në fundin e muajit qershor, shifra arriti në 402 ditën e shtunë. Nga ana tjetër, korriku paraqiti një bilanc pozitiv për sa i përket fataliteteve.
Gjatë muajit të shkuar humbi vetëm një qytetar, shifër kjo shumë më e ulët krahasuar me muajt paraardhës.
Ecuria e vaksinimit ishte gjithashtu pozitive. Gjatë muajit të shkuar u kryen 222,813 vaksinime kundër Covid-19, me një mesatare ditore prej rreth 7 mijë dozash të administruara. Shtresa e popullsisë së vaksinuar pritet të zgjerohet edhe më tej gjatë gushit, muaj i cili është përcaktuar si i hapur për të gjithë personat mbi 18 vjeç që duan të vaksinohen. (A2 Televizion)
A2 CNN Livestream
MUND TE LEXONI GJITHASHTU
