Britania e Madhe hap dyert për shtetasit e huaj, por me kushte. Cilido që do të udhëtojë drejt shtetit ishull nga 8 qershori, do të duhet të izolohet për 14 ditë.
Ata që mbërrijnë në vend, me avionë, trena e traget, përfshirë shtetas britanikë, do të duhet të japin adresën ku do të vetëkarantinohen, e në rast të shkeljes se rregullave do të gjobiten me 1 000 paund. Industria e Aviacionit Civil dhe disa deputetë konservatorë e kanë kundërshtuar masën, por sekretarja për Punët e Brendshme, Priti Patel, tha se ligji i ri synonte parandalimin e një vale të dytë të koronavirusit: “Shkenca ka folur qartë. Nëse kufizojmë rrezikun e importimit të rasteve të reja nga jashtë, mund të ndihmojmë në parandalimin e një vale të dytë shkatërruese nga Covid-19”.
Shumë industri paralajmërojnë se do të preken rëndë nga rregullat e reja, të cilat, sipas shefit të kompanisë britanike të fluturimeve “low cost”, Ryanair, janë thjesht një marifet politik: “Mund të jesh në Sainsbury, në plazh apo në një kurs golfi ditën kur zyra për punët e brendshme mund të telefonojë dhe gjithçka që ata do të kenë është një numër telefoni”.
British Airways, EasyJet dhe Ryanair janë ankuar ndaj masës te prokurori i përgjithshëm, Sir Jonathan Jones, hapi i parë i aksionit ligjor kundër qeverisë. Nga rregullat do të përjashtohen shtetasit e Republikës së Irlandës, ishujt në kanalin anglez dhe Isle of Man, shtetasit e të cilëve nuk duhet të plotësojnë ndonjë formular apo të hyjnë në karantinë.
E njëjta gjë vlen edhe për punonjësit e disa industrive që ofrojnë shërbime thelbësore. (A2 Televizion)
A2 CNN Livestream
MUND TE LEXONI GJITHASHTU
