Analisti Mentor Kikia, i ftuar në A2, komentoi ndër të tjera, zgjedhjen e Bledi Çuçit si ministër të Brendshëm, duke theksuar se kjo ishte një surprizë, por një zgjedhje e mençur e Ramës.
“Ishte një surprizë, Bledi Çuçi në krye të ministrisë së Brendshme. Mendoj se ka qenë një zgjedhje e goditur e kryeministrit, një zgjedhje e mençur për situatën që po kalon qeveria. Kur them një zgjedhje e mençur nuk po them për interesat e shqiptarëve, por për kryeministrin Rama. Çuçi është njeri me profil të ulët konfliktual, me profil qytetar. Ministria e Brendshme ka qenë një kockë e fortë, e synuar, dhe për pasojë ministria që ka pësuar më shumë ndryshime. Nuk mendoj se një ministër i Brendshëm duhet të jetë një figurë madhore ushtarake, sepse Policia e Shtetit është tërësisht nën kontrollin e Drejtorit të Përgjithshëm, i cili është zyrtarisht i pranuar edhe nga Rama se është një besnik i tij, një njeri i palëshuar nga kryeministri. Policia nëse duhet të përdoret nga kryeministri është nën kontrollin e tij. Ministria e Brendshme, në këtë situatë, është më shumë Ministria e zgjedhjeve dhe unë besoj se Çuçi është njeriu i duhur pasi vjen nga procese të rëndësishme si reforma territoriale dhe zgjedhore”.
Por, cilat janë arsyet që e bën Ramën të emërojë Bledi Çuçin ministër të Brendshëm? “Arsyet janë dy. Së pari, profili i ulët dhe jokonfliktual dhe së dyti, e cila mendoj është edhe më e rëndësishme, përgatitja e vendit dhe administrimi i procesit jozgjedhor, por i përgatitjes për zgjedhje, siç janë listat e zgjedhësve, transferimi i adresave të qytetarëve. Ka një mori punësh për të bërë qeveria, para se të shkohet në zgjedhje. Çuçi është një nga njerëzit që e njeh shumë mirë këtë gjë. Tani, se cili është qëllimi për të vendosur një person që e njeh këtë proces, për të bërë një punë të mirë apo për të bërë llogari të tjerë, këtu nuk dua të futem në të tilla hipoteza”. (A2 Televizion)
A2 CNN Livestream
MUND TE LEXONI GJITHASHTU
