Pas akuzave të Kosovës për 3 efektivë të rrëmbyer, kreu i të ashtuquajturës “Zyra për Kosovën” në Qeverinë e Serbisë, Petar Petkoviç është shprehur se Serbia nuk ka kaluar asnjë centimetër nga kufiri i saj, e ndërsa u bën thirrje të huajve që të hapin një hetim ndërkombëtar.
Në një reagim për mediat, Petkoviç teksa i quan 3 policët “terroristë shqiptarë”, i akuzon se janë pikërisht ata që kanë shkelur marrëveshjen pasi kanë hyrë në territoret e Serbisë dhe për rrjedhojë janë arrestuar.
“Kjo bandë terroriste është arrestuar sot në ora 12:38 në thellësi të territorit të Serbisë qendrore në zonën e fshatit Gnjilicë në komunën e Rashkës. Ata që kanë shkelur këto marrëveshje ndërkombëtare janë pikërisht këta terroristë shqiptarë, pjesëtarë të policisë së Kosovës. Ne jemi absolutisht të gatshëm të ofrojmë të gjitha provat dhe të bëjmë thirrje që të hapet një hetim ndërkombëtar, nëse është e nevojshme, që edhe amerikanët dhe britanikët të paraqesin imazhet e tyre satelitore në mënyrë që ajo që po themi të shihet qartë, që është se Policia serbe nuk ka kaluar asnjë milimetër vijë administrative. Ministri i tyre i rremë Sveçlja thotë se ata janë rrëmbyer. Çfarë kërkojnë me armë, harta, GPS, thellë në Serbinë qendrore dhe në pyll? Këtë do ta përcaktojë hetimi”, ka thënë ai.
Sipas tij, Rados Petroviq, Dushan Obrenoviq dhe Milun Milenkoviç Lune janë rrëmbyer në të vërtetë dhe jo forcat speciale të Kosovës, duke pretenduar se kanë qenë thellë në territorin e Serbisë qendrore.
"Ata nuk do të torturohen, as nuk do të rrahen, as nuk do të rrahen. Policia jonë bën gjithçka sipas ligjit. Radoshi dhe Dushani u rrahën. Radoshi e ndryshoi pamjen e tij fizike nga rrahja. Ata e rrahën Lunetin aq shumë derisa po e futnin në veturën që duhet ta mbulojnë me leckë që të mos shohësh se çfarë i kanë bërë dhe e gjithë kjo para vajzës së tij”, ka thënë Petkoviç.
Qeveria e Kosovës pretendon për 3 policë të arrestuar në territoret e saj dhe kryeministri Albin Kurti është shprehur se hyrja e forcave të Serbisë në territorin e saj është agresion dhe synim për eskalim dhe destabilizim. (A2 Televizion)
A2 CNN Livestream
MUND TE LEXONI GJITHASHTU
