Gonorrea dhe sifilizi arrijnë nivele rekord në Evropë

Infeksionet seksualisht të transmetueshme, përfshirë gonorrenë dhe sifilizin, kanë arritur nivele rekord në Evropë, sipas të dhënave të reja.

Qendra Evropiane për Parandalimin dhe Kontrollin e Sëmundjeve (ECDC) tha se të dy sëmundjet kishin arritur nivelet e tyre më të larta në më shumë se 10 vjet në vitin 2024.

Gonorrea arriti në 106,331 raste, një rritje prej 303% që nga viti 2015, ndërsa sifilizi u dyfishua në të njëjtën periudhë në 45,557, shkruan A2CNN. 

Agjencia shëndetësore tha se "zgjerimi i boshllëqeve në testim dhe parandalim" ishte pjesërisht shkaku i rritjes së transmetimit dhe bëri thirrje për veprime urgjente.

“Këto infeksione mund të shkaktojnë ndërlikime të rënda, të tilla si dhimbje kronike, infertilitet dhe në rastin e sifilisit, probleme me zemrën ose sistemin nervor”, tha Bruno Ciancio, kreu i njësisë së Sëmundjeve të Transmetueshme Direkt dhe të Parandalueshme nga Vaksina e agjencisë.

Ai tha se rastet e sifilisit kongenital, "ku infeksionet kalojnë direkt tek të porsalindurit, duke çuar në ndërlikime potencialisht të përjetshme", pothuajse ishin dyfishuar nga viti 2023 në vitin 2024.

"Mbrojtja e shëndetit tuaj seksual mbetet e thjeshtë. Përdorni prezervativë me partnerë të rinj ose të shumtë dhe testohuni nëse keni simptoma", shtoi ai.

Spanja kishte numrin më të lartë të rasteve të konfirmuara të gonorresë dhe sifilizit nga vendet evropiane pjesëmarrëse në vitin 2024, me 37,169 dhe 11,556.

  (A2 Televizion)