Një tjetër tërmet me magnitudë 5.2 ballë të shkallës Rihter goditi Afganistanin lindor të martën, shumë pranë epiqendrës së tërmetit të fuqishëm që goditi vendin në fundjavë, e që la të vdekur më shumë se 1,400 njerëz.
Sipas Shërbimit Gjeologjik të SHBA-së epiqendra e tërmetit të sotëm ishte 21 milje në verilindje të qytetit Jalalabad në provincën Nangarhar. Shkalla e dëmit, nëse ka, nga tërmeti i fundit nuk dihet aktualisht.
Gjatë fundjavës, Afganistani u godit nga një tërmet me magnitudë 6.0 që talebanët thanë sot se vrau gjithsej 1,400 njerëz.
Tërmeti i fuqishëm me magnitudë 6.0 i së dielës në mbrëmje goditi disa provinca, duke shkaktuar dëme të mëdha. Ai rrafshoi fshatrat dhe bllokoi njerëzit nën rrënojat e shtëpive të ndërtuara kryesisht me tulla balte dhe dru që nuk ishin në gjendje t'i rezistonin goditjes.
Terreni i ashpër po pengon përpjekjet e shpëtimit dhe ndihmës, duke i detyruar autoritetet talebane të dërgojnë nga ajri dhjetëra komando për të evakuuar të plagosurit nga vendet ku helikopterët nuk mund të ulen.
Indrika Ratwatte, koordinatorja rezidente e OKB-së për Afganistanin, tha se ekipet e shpëtimit po përpiqen të arrijnë në zonën malore dhe të largët të goditur. Në një konferencë për shtyp në Gjenevë të martën, ai paralajmëroi për një rritje të numrit të viktimave.
"Nuk mund të harrojmë popullin e Afganistanit që po përballet me kriza të shumta dhe tronditje të shumta", tha Ratwatte, ndërsa i bëri thirrje komunitetit ndërkombëtar të bëjë një hap përpara.
"Këto janë vendime për jetë a vdekje, ndërsa ne garojmë me kohën për të arritur njerëzit", tha ai.
Ky është tërmeti i tretë i madh që kur talebanët morën pushtetin në vitin 2021 dhe kriza e fundit që ka përfshirë Afganistanin, i cili po përballet me shkurtime të thella për financimin e ndihmës, një ekonomi të dobët dhe miliona njerëz të kthyer me forcë nga Irani dhe Pakistani. (A2 Televizion)
A2 CNN Livestream
MUND TE LEXONI GJITHASHTU
