“Shkarkimi i Metës”, Gjokutaj: Presidenti nuk tejkalon kompetencat duke shprehur një opinion

Presidenti Ilir Meta nuk ka shkelur rëndë Kushtetutën dhe nuk ka tejkaluar kompetencat duke shprehur një opinion. Këtë arsyetim ligjor dha në studion e Debatit me Alba Alishanin, avokati Genc Gjokutaj. Në këndvështrimin e tij, Gjokutaj theksoi se nuk tejkalohet kompetenca duke shprehur një opinion, por kur në veprimtarinë ligjore dhe firmosjen e dekreteve del nga suaza e presidentit.

“Absolutisht nuk tejkalohet kompetencat duke shprehur një opinion, por kur në veprimtarinë ligjore e firmosjen e dekreteve del nga suaza e presidentit, shprehesh qartësisht politikisht. Gjëra që ky komision politik nuk i ka ngritur dhe nga ana tjetër na servir në Gjykatën Kushtetuese për të krijuar një precedent që do të jetë më i gabuari. Pa çështje ti të ngresh vendim dhe të ndalosh presidentin të thotë një mendim të jetës politike shqiptare”.

Për Gjokutajn, ngritja e Komisionit Hetimor për shkarkimin e kreut të shtetit është vullnet politik i mazhorancës, por shkelja e presidentit duhet të jetë e materializuar në akte. Sipas tij vendimi i pritshëm pas 30 ditësh i Gjykatës Kushtetuese ka rëndësi sepse do të krijojë një precedent për mënyrën sesi shkarkohet një president.

“Kushtetuta bazohet në krimin e rëndë dhe shkeljen e rëndë. Merr rëndësi se ky vendim do të shtrojë një trase për mënyrën sesi shkarkohet një president për formën sesi shkarkohet dhe lëndën përse shkarkohet. Mungesa e precedentit e vështirëson rastin, sa i përket shkeljes së rëndë do argumentim shterues nga ana e gjykatës. Shkelja e presidentit duhet të jetë e materializuar në akte. Për shembull shkelje e rëndë është nëse ka cenuar tërësinë territoriale apo lirinë e zgjedhjeve”.

Gjokutaj e justifikon reagimin e presidentit me arsyetimin se në mungesë të opozitës është munduar të mbajë ekuilibrin ligjor dhe të shprehë opinionin e tij.

“Presidenti para se të jetë president është shtetas, si president i takon e drejta të shprehet me rezervat që ka ndaj pushtetit e opozitës. Presidenti mund të zgjidhte një rrugë tjetër që të mos fliste dhe këtu mund të mos shkarkohej se nuk ka folur. Mungesa e opozitës e ka shtyrë presidentin për të këmbëngulur. Ka kthyer ligjet se në 90% të rasteve mazhoranca as ka denjuar ta lexojë. Presidenti në mungesë të opozitës është munduar të mbajë ekuilibrin ligjor. Më i rëndë është akti që të bëhet me njërën palë sesa të jetë mbi palët”. (A2 Televizion)