Shkarkimi i Presidentit, të hënën seanca e radhës. Përfaqësuesi i Metës kërkoi kohë për t’iu përgjigjur 70 pyetjeve

Trupa gjykuese në Kushtetuese vendosi të shtyjë për të hënën seancën për shkarkimin e Presidentit Ilir Meta. Anëtarët e Gjykatës i drejtuan 70 pyetje përfaqësuesit të Presidentit, Bledar Dervishajt, i cili kërkoi 48 orë kohë për t’iu përgjigjur pyetjeve, me argumentin se duhet të informojë edhe Metën për këto pyetje.

Kryetarja e Gjykatës, Vitore Tusha, tha: “Duke u nisur nga natyra e gjykimit dhe mban parasysh kërkesën për 48 orë të përfaqësuesit të presidentit, dhe nga volumi i pyetjeve. Kjo kohë do të përdoret edhe nga iniciuesi i gjykimit për t’u njohur. Seanca e radhës ditën e hënë ora 10:00”.

“Besoj se i dëgjuat live, ishte një material 170 faqe, materiali mbrojtës bashkangjitur provave. Presidenti ka kërkuar që prej 1 korrikut që ky shqyrtim kushtetues të përfundonte brenda legjislaturës së kuvendit të vjetër që investoi më kot Gjykatën Kushtetuese”, tha përfaqësuesi i Presidentit, Bledar Dervishaj, pas seancës. (A2 Televizion)