Një familje prej 5 anëtarësh në Trebinjë të Pogradecit mbeti e pastrehë pasi flakët e zjarrit përfshinë banesën e tyre mbrëmjen e të hënës. Për pasojë, e gjithë banesa, bashkë me orenditë dhe çdo send personal të familjarëve, u shkrumbuan.
Pavarësisht ndërhyrjes së zjarrfikësve, por edhe banorëve të zonës, banesa u dogj tërësisht, shkruan A2.
Fatmirësisht, nga flakët nuk pati të lënduar. Kryefamiljari Agron Qose tregon se gjithçka nisi pas një shkëndije elektrike në çati dhe më pas e gjithë banesa në pak sekonda u përfshi nga flakët: “Rreth orës 4, ishim në shtëpi brenda me gjithë gruan, dëgjuam një kërcitje, por nuk ia vumë veshin, vetëm kur erdhi një komshi dhe na thirri, dilni se u dogjët. Kur për 5 minuta ra çatia përdhe, ranë tavanet dhe s'mundëm dot të shpëtojmë asgjë prej gjëje hiç. Erdhi zjarrfikësja, por nuk patën mundësi të bënin shumë, bile njëri zjarrfikës u aksidentua duke fikur zjarrin sepse u rrëzua kur punonte”.
Teksa të pestë anëtarët e familjes mbetën pa çati mbi tokë, tashmë shpresa e tyre e vetme është shteti, pasi të gjitha kursimet e tyre të jetës i kishin futur në ndërtimin e shtëpisë. Kryetari i Bashkisë Pogradec, Ilir Xhakolli, teksa vizitoi familjen, tha se Bashkia do të bëjë të gjitha përpjekjet ligjore për ringritjen e banesës së djegur.
Aktualisht, familja Qose është strehuar tek të afërmit në fshat, ndërsa kanë nevoja urgjente për veshmbathje dhe ushqime bazë. (A2 Televizion)
A2 CNN Livestream
MUND TE LEXONI GJITHASHTU
