Policia ka zbardhur ngjarjen e ndodhur rreth tre javë më parë, ku një sasi lënde plasëse shpërtheu në portën e jashtme të banesës së nënës së Gentian Zotos në Vlorë. Në operacionin policor të koduar “Objektivi”, u arrestuan autorët e dyshuar të ngjarjes, babë e bir, Divid Goxhaj dhe Ferdinant Bombaj, të dy banues në fshatin Babicë e Madhe.
Sipas policisë, Divid Goxhaj, 59 vjeç, dhe Ferdinant Bombaj, 29 vjeç, akuzohen për veprat penale “Shkatërrimi i pronës me eksploziv”, kryer në bashkëpunim, si dhe “Vjedhja”.
Sipas hetimeve të policisë, ata kanë mbajtur në banesën e tyre një automjet tip “Volkswagen Golf Plus”, i vjedhur më herët në qytetin e Elbasanit.
Më 29 nëntor 2025, automjeti dyshohet se është përdorur për t’u afruar pranë banesës së shtetases Bakie Zoto, ku është vendosur lënda plasëse në portën e jashtme të banesës. Pas shpërthimit, automjeti i përdorur nga autorët është gjetur i djegur në fshatin Babicë e Vogël.
Ngjarja dyshohet të ketë ndodhur për konflikte të djalit të saj, Gentian Zoto, një person i njohur për policinë. Gentian Zoto është dënuar me 35 vite burg për atentatin ndaj Inez Hajrullës më 10 maj 2019 në Vlorë.
(A2 Televizion)
A2 CNN Livestream
MUND TE LEXONI GJITHASHTU
