AMP në zbatim të një urdhri nga Prokuroria ka pezulluar nga detyra këtë të premte shefin e Krimeve në Komisariatin e Përmetit, Dhurim Çenko, i cili akuzohet për “shpërdorim detyre”, në rastin e abuzimit seksual me një të mitur që u zbulua muajin e kaluar.
“Agjencia e Mbikëqyrjes Policore (Rajoni Vlorë - Gjirokastër) ka ekzekutuar urdhrin e Prokurorisë Pranë Gjykatës së Shkallës së Parë të Juridiksionit të Përgjithshëm Gjirokastër, e cila ka caktuar masën e sigurisë të karakterit ndalues “Pezullim i ushtrimit të një detyre a shërbimi publik” për punonjësin e policisë N/Komisar DH. Ç., me detyrë (në kohën e kryerjes së veprës penale) Shef Seksioni në Seksionin për Hetimin e Krimeve në Volum, në Komisariatin e Policisë Përmet. Ai dyshohet për kryerjen e veprës penale “Shpërdorim i detyrës”. Ekzekutimi i urdhrit u bë në vijim të hetimeve të thelluara lidhur me procedimin penal të vitit 2025, ku gjatë marrjes së deklarimeve dhe veprimeve të tjera hetimore ka dyshime të arsyeshme për shkelje nga ana e oficerit të Policisë”, informon AMP.
Sipas organit të akuzës, Çenko rezulton se ka qenë në dijeni të skandalit seksual me protagonistë dy efektivët e policisë së Përmetit, Pajtim Baka dhe Artur Ago, me këtë të fundit që kryente veprime të turpshme në video me një 16-vjeçare.
Për rastin në fjalë, Gjykata e Shkallës së Parë në Gjirokastër ka caktuar masën e arrestit “burg pa afat” për Pajtim Baken, kolegun e Dhurim Çenkos dhe shpallur në kërkim policin tjetër të Komisariatit të Tepelenës, Artur Ago.
Po ashtu AMP bën me dije se vijon puna për zbardhjen e plotë të rrethanave dhe përfshirjen e mundshme të personave të tjerë në këtë veprimtari kriminale. (A2 Televizion)
A2 CNN Livestream
MUND TE LEXONI GJITHASHTU
