Një person është shoqëruar nga policia në lidhje me vrasjen e Viktor Bardhit, ngjarje e ndodhur mëngjesin e të enjtes në Mirditë, raporton A2 CNN.
Drejtori i Policisë së Lezhës, Ermal Muçaj, konfirmoi shoqërimin, por shtoi se nuk mund të jepte detaje të tjera. “Kemi një person të shoqëruar dhe pista hetimi kemi, por nuk mund ta ndajmë në këtë moment me mediat”, tha Muçaj, përcjell A2 CNN. “Nuk janë gjetur armë në makinë”.
Muçaj shtoi se policia ka marrë njoftim për ngjarjen rreth orës 8:55 të mëngjesit të së enjtes. “Kemi ngritur grupin hetimor, kemi ardhur në vendngjarje dhe, nga veprimet e para hetimore, ka rezultuar se një shtetas është vrarë në automjetin e tij. Bëhet fjalë për shtetasin Viktor Marku, i datëlindjes 1961.
Ndërkohë, siç jeni edhe ju vetë prezentë, po kryhen të gjitha veprimet hetimore”, tha ai.
“Rreth 20 minuta pas ngjarjes, në fshatin Rrëshen, që është afër Rubikut, këtu pranë, është djegur një automjet. Edhe për këtë rast është ngritur një grup i dytë hetimor, i cili po sqaron rrethanat e ngjarjes. Po kryhen të gjitha veprimet hetimore, po fiksohen të gjitha provat dhe po pyeten dëshmitarët. Do të kemi një njoftim të dytë sapo të kemi diçka të re në lidhje me këtë ngjarje”. (A2 Televizion)
A2 CNN Livestream
MUND TE LEXONI GJITHASHTU
