Në brigjet shqiptare të Liqenit të Ohrit, pranë fshatit Lin, arkeologët kanë zbuluar një nga vendbanimet më të hershme të ndërtuara mbi ujë në Europë, i cili daton deri në 8000 vjet më parë. Ky zbulim i jashtëzakonshëm po cilësohet si vendbanimi më i vjetër i njohur deri më tani në një liqen europian.
Ekipi i përbërë nga arkeologë zviceranë dhe shqiptarë ka kaluar vite të tëra duke punuar nën ujë, në një thellësi prej rreth tre metrash, për të nxjerrë me kujdes nga nëntoka shtyllat prej druri mbi të cilat qëndronin shtëpitë e banorëve të lashtë. Gjetjet përfshijnë gjithashtu eshtra kafshësh të egra dhe të zbutura, objekte prej bakri dhe enë qeramike me gdhendje të detajuara.
Sipas profesorit Albert Hafner nga Universiteti i Bernës, vendbanime të ngjashme janë zbuluar më parë në Alpe dhe në rajonet mesdhetare, por ato në fshatin Lin janë rreth 500 vjet më të vjetra. Datimi i objekteve është bërë përmes metodave të radiokarbonit dhe dendrokronologjisë, teknika që analizon unazat vjetore të rritjes së pemëve. Deri më tani janë mbledhur mbi një mijë mostra druri.
Sipas studiuesve, ky vendbanim mbulon një sipërfaqe prej rreth gjashtë hektarësh, por vetëm rreth 1% e tij është gërmuar gjatë gjashtë viteve të fundit. Mendohet se aty kanë jetuar disa qindra njerëz, të organizuar në një komunitet që ushqente veten me bujqësi, gjueti dhe blegtori.
Ky zbulim jo vetëm që ndriçon një pjesë të panjohur të historisë së Shqipërisë, por gjithashtu dëshmon për rolin kyç që banorët e lashtë të zonës kanë pasur në përhapjen e bujqësisë dhe blegtorisë në Europë.
Liqeni i Ohrit, i ndarë mes Shqipërisë dhe Maqedonisë së Veriut, është liqeni më i vjetër në Europë, me një moshë mbi një milion vjet. Zbulimi në Lin e bën këtë zonë jo vetëm një pasuri natyrore, por edhe një thesar të pazëvendësueshëm arkeologjik e historik. (A2 Televizion)
A2 CNN Livestream
MUND TE LEXONI GJITHASHTU
