Refuzimit për rritjen e pagës së magjistratëve pa miratuar më parë ligjin në kuvend iu bashkua edhe ministri i Drejtësisë. Për të qetësuar KLGJ e KLP, Toni Gogu doli në deklaratë të posaçme për mediet ku premtoi zbatimin e vendimit të gjykatës kushtetuese, ku përfitimet do të nisin prej vitit 2023.
“Paraja publike është para e qytetarëve, nuk është e qeverisë. Çdo qindarkë e buxhetit të shtetit duhet të ketë autorizim ligjor për t’u shpenzuar. Përgjegjshmëria ndaj buxhetit dhe zbatimi i vendimit të Gjykatës Kushtetuese nuk janë në luftë me njëra-tjetrën. Përkundrazi, kërkojnë të njëjtën gjë: autorizimin e qartë ligjor për ta zbatuar”.
Sherrnajën e krijuar gjatë ditëve të nxehta të gushtit, ministri tentoi ta minimizonte duke e lidhur problemin vetëm me mungesën e bazës ligjore. Ashtu si ministri i Financave dhe Gogu shton se formula e pages duhet votuar më parë nga deputetët.
“Duhet ta themi troç: kemi arritur këtu sepse na mungon baza ligjore për formulën e pagës së magjistratëve, të cilën Gjykata Kushtetuese e shfuqizoi. Ky boshllëk duhet të plotësohet atje ku e ka vendin: në Kuvend, me ligj”.
Përplasjen institucionale, Gogu thotë se do ta zgjidhë Kuvendi me nisjen e sesionit të ri parlamentar.
“Zgjidhja nuk është që institucionet të përplasen me njëra-tjetrën. Zgjidhja është në Kuvendin e Shqipërisë. Detyra ime është që kjo të bëhet shpejt dhe sa më mirë”.
Çështja e pagave të gjyqtarëve dhe prokurorëve ka përplasur qeverinë me gjyqësorin. Gjykata Kushtetuese ka detyruar Kuvendin që të ndryshojë ligjin për llogaritjen e pagave të togave të zeza, por Këshilli i Lartë i Prokurorisë dhe Këshilli i Lartë Gjyqësor nuk pritën vendimin e legjislativit por vendosën që të rrisin vetë pagat e tyre. (A2 Televizion)
A2 CNN Livestream
MUND TE LEXONI GJITHASHTU
