Klubi i Dritës ka shkruar një faqe të re në historinë e futbollit kosovar, duke u kualifikuar për herë të parë në fazën e grupeve të Ligës së Konferencës. Kampioni nga Gjilani siguroi këtë sukses historik pas një performance të shkëlqyer ndaj skuadrës luksemburgase Differdange.
Pas fitores 2-1 në ndeshjen e parë të luajtur në Prishtinë, Drita udhëtoi drejt Luksemburgut me një epërsi të lehtë, por vendimtare. Ndeshja e kthimit konfirmoi vendosmërinë dhe forcën e skuadrës së Zekirija Ramadanit.
Që në fillim të takimit, Drita tregoi dominim në fushë, veçanërisht pas përjashtimit të sulmuesit Andreas Buch të Differdange në minutat e para. Pavarësisht një rasti të mirë të vendasve në minutën e 7-të, portieri Faton Maloku shkëlqeu me një pritje vendimtare për të mbajtur rezultatin të pandryshuar.
Drita vazhdoi të krijonte raste: Ilir Mustafa goditi traversën në minutën e 26-të, ndërsa Veton Tusha ishte pranë golit në kohën shtesë të pjesës së parë.
Momenti vendimtar erdhi në minutën e 62-të të ndeshjes, kur Besnik Krasniqi shënoi nga pika e bardhë, duke çuar Dritën në epërsi 1-0 dhe forcuar rezultatin e përgjithshëm në 3-1. Pas këtij goli, Differdange tentoi të rikthehej në lojë, por Faton Maloku vazhdoi të ishte hero për Dritën me dy pritje të jashtëzakonshme.
Në minutën e 94-të, Kristal Abazaj pati mundësinë të vuloste fitoren, por portieri vendas reagoi në mënyrë fantastike.
Me këtë fitore 1-0 në ndeshjen e kthimit dhe rezultat të përgjithshëm 3-1, Drita siguron kualifikimin në fazën e grupeve të Ligës së Konferencës, duke u bërë skuadra e dytë nga Kosova që arrin këtë sukses në një garë evropiane, pas FC Ballkanit.
Ky është një moment historik jo vetëm për klubin e Dritës, por edhe për qytetin e Gjilanit dhe gjithë futbollin kosovar, që po e forcon gjithnjë e më shumë prezencën e tij në skenën ndërkombëtare. (A2 Televizion)
A2 CNN Livestream
MUND TE LEXONI GJITHASHTU
