Trajneri i Kombëtares shqiptare, Silvinjo, doli ditën e sotme në konferencën e zakonshme për shtyp në prag të ndeshjeve të rëndësishme të muajit shtator, ku zbuloi edhe listën me emrat e futbollistëve të grumbulluar. Braziliani theksoi rëndësinë e ndeshjes së ardhshme dhe u ndal tek zgjedhjet që ka bërë, duke u treguar i qartë se ky nuk është momenti për eksperimente.
“Ne kemi bërë rreth 50% të rrugëtimit dhe kemi edhe katër ndeshje për të luajtur. Po luftojmë kundër kohës. Është një ndeshje shumë e rëndësishme që e luajmë në shtëpi dhe do të përgatitemi mirë”, u shpreh Silvinjo.
Ai konfirmoi mungesën e Ardian Ismajlit, për shkak të një dëmtimi të lehtë, ndërsa shtoi se vendimet për listën janë marrë me shumë kujdes.
“Në lidhje me mungesat, kam folur me Ismajlin. Ai ka bërë një transferim së fundmi dhe ka një dëmtim të lehtë. Duhet të jetë i qetë për të qenë 100% gati. Sa i përket ndryshimeve në listë, një grup ndryshon kur një lojtar nuk ka më çfarë jep për Kombëtaren dhe kur unë jam i bindur për këtë. Ndryshe, nuk ka pse të ndryshohet. Kam besim te të gjithë lojtarët”, tha trajneri.
Silvinjo pranoi se ka pasur dilema gjatë përgatitjes së listës dhe se përzgjedhjet janë bërë me kujdes të madh, duke marrë parasysh rëndësinë e ndeshjeve të ardhshme.
“Po, kam pasur shumë dilema. Puna për listën ka nisur që në fillim të gushtit. Një ndeshje si kjo kërkon përvojë dhe përgjegjësi. Të sjellësh lojtarë të rinj tani, nuk është momenti i duhur. Mund të jenë shumë të talentuar, por tani na duhen lojtarë që e njohin stilin tonë të lojës dhe marrin përgjegjësi. Do vijë momenti i tyre, por jo tani.”
Në fund, Silvinjo theksoi edhe njëherë se fokusi është vetëm te fitorja dhe se nuk ka më vend për testime. “Nuk është momenti për të eksperimentuar. Kemi bërë eksperimente në këto dy vite. Tani është koha të fitojmë.” (A2 Televizion)
A2 CNN Livestream
MUND TE LEXONI GJITHASHTU
