Fenerbahçe ka shkarkuar trajnerin José Mourinho vetëm pas dy ndeshjeve zyrtare në krye të ekipit këtë sezon, pasi klubi turk dështoi të kualifikohej në fazën e grupeve të Champions League. Skuadra e Mourinhos u mund 1-0 nga Benfica në ndeshjen e “play-off”-it, duke vulosur eliminimin dhe duke sjellë fundin e shpejtë për teknikun portugez. Në një deklaratë në rrjetet sociale, Fenerbahçe tha: "E falënderojmë për përpjekjet e tij për skuadrën deri sot dhe i urojmë suksese në karrierën e tij të ardhshme”.
Mourinho bëhet trajneri i dytë që shkarkohet në Turqi brenda ditës, pasi edhe Ole Gunnar Solskjaer u largua nga Beshiktashi pak minuta pas eliminimit nga Conference League.
Disa ditë më parë u përfol që Mourinho mund të bëjë një rikthim surprizë në Premier League. Sipas mediave britanike, trajneri portugez është kandidati kryesor për të marrë drejtimin e Nottingham Forest.
Klubi anglez, pavarësisht kualifikimit për në Europa League sezonin e kaluar dhe një debutimi me fitore këtë sezon, duket se është në prag të ndarjes me trajnerin aktual Nuno Espírito Santo. Arsyeja? Kritikat e hapura të portugezit për merkaton verore dhe vonesat në përgatitjet e skuadrës, përcjell A2 CNN. “Kam pasur gjithmonë një marrëdhënie të mirë me presidentin Evangelos Marinakis dhe flisnim çdo ditë, por kohët e fundit gjërat nuk kanë shkuar mirë. Jam i shqetësuar për sezonin”, tha Nuno, duke konfirmuar tensionet me drejtuesit.
Nëse marrëveshja finalizohet, kjo do të ishte eksperienca e katërt e Mourinhos në Premier League pas Chelsea-t (në dy periudha), Manchester United dhe Tottenham. (A2 Televizion)
A2 CNN Livestream
MUND TE LEXONI GJITHASHTU
