25 Lojtarë të thirrur nga trajneri Silvinjo për dy ndeshjet e muajit shtator. Braziliani publikoi listën zyrtare me futbollistët e thirrur për miqësoren ndaj Gjibraltarit që do të luhet më 4 shtator në transfertë dhe në datën 9 me Letoninë në Arenën Kombëtare, shkruan A2 CNN. Nuk ka risi dhe ndryshime krahasuar me listën e muajit qershor. Dy mungesat e vetme për brazilianin janë Alen Sherri dhe Ardjan Ismajli, si portieri ashtu dhe mbrojtësi janë të dëmtuar. Në konferencën për shtyp, trajneri Silvinjo tregoi se rëndësia që ka ndeshja me Letoninë maksimale.
“Ne kemi bërë rreth 50% të rrugëtimit dhe kemi 4 ndeshje për të luajtur, po luftojmë kundër kohës. Është një ndeshje shumë e rëndësishme që e luajmë në shtëpi, do të përgatitemi mirë. Për sa i përket lojtarëve që mungojnë fola me Ismajlin, i cili ka bërë tashmë një transferim javët e fundit, ka një dëmtim të lehtë dhe duhet të jetë i qetë për të qenë në 100% e tij. Për sa i përket ndryshime në listën, një grup ndryshon kur një lojtar nuk ka se çfarë jep më në Kombëtare dhe kur kam bindjen që është ashtu, ndryshe nuk ka pse të ndryshojë asgjë në grup, unë kam besim te të gjithë lojtarët”, tha trajneri në konferencë për mediat.
Dilemat për këto dy takime kanë qenë të shumta për brazilianin dhe stafin e tij megjithatë sipas tij, në situatën që kombëtarja është nuk ka vend për eksperimente. “Të sjellësh lojtarë të rinj, ndoshta nuk është momenti i duhet. Duhet të fokusohemi te lojtarët që janë mësuar me stilin e lojës, që marrin përgjegjësi, nuk është momenti i një djaloshi 20 vjeçar që sigurisht mund të jetë shumë i mirë, por na duhen lojtarë që janë mësuar. Do vijë momenti i tyre. Ishte e vështirë, por kemi besim që lojtarët që kemi përzgjedhur do na përgjigjen në fushë”.
Kombëtarja shqiptare ka luajtur 4 ndeshje kualifikuese në botëror, nga të cilat ka marr 5 pikë. Aktualisht kuqezinjtë janë në vendin e dytë me 1 pikë më shumë se Serbia, por kombëtarja serbe ka 2 ndeshje ma pak.
Grumbullimi i Kombëtares do të nisë të hënën, më 1 shtator, në Malaga, ku kuqezinjtë do të përgatiten për ndeshjen miqësore ndaj Gjibraltarit, e cila do të luhet më 4 shtator në stadiumin “Europa Point”, në orën 18:00.
Më pas, më 5 shtator, Kombëtarja do të rikthehet në Tiranë për të vijuar përgatitjet në kuadër të ndeshjes kualifikuese ndaj Letonisë, që do të zhvillohet më 9 shtator, në stadiumin “Air Albania”, në orën 20:45.
Lista e plotë:
Portierë: Thomas Strakosha, Elhan Kastrati, Mario Dajsinani
Mbrojtës: Elseid Hysaj, Ivan Balliu, Mario Mitaj, Naser Aliji, Marash Kumbulla, Adrian Bajrami, Berat Gjimshiti, Arlind Ajeti
Mesfushorë: Ylber Ramadani, Juljan Shehu, Kristjan Asllani, Medon Berisha, Qazim Laçi, Adrion Pajaziti, Nedim Bajrami, Arbër Hoxha, Ernest Muçi, Jasir Asani
Sulmues: Armando Broja, Myrto Uzuni, Rey Manaj, Mirlind Daku
(A2 Televizion)
A2 CNN Livestream
MUND TE LEXONI GJITHASHTU
