Stuhi bore në Kukës, shumë fshatra pa energji. Ndërpritet edhe mësimi

Shumë fshatra të thella malore të Kukësit mbetën pa energji elektrike gjatë natës, por edhe gjatë ditës së enjte.

Shkak është bërë stuhia me erëra të forta e reshje bore, duke nxjerrë jashtë pune disa linja të transmetimit të energjisë, por edhe shtylla elektrike. Probleme ka patur edhe me mbarëvajtjen e procesit mësimor, ku në disa shkolla, kryesisht në njësitë e Bushtricës, Shishtavecit e Zapodit, nuk është zhvilluar procesi mësimor, pasi bora e grumbulluar në rrugë, për shkak të erës së fortë, nuk ka mundësuar lëvizjen e mësuesve drejt këtyre shkollave.

Vështirësi në lëvizje, për shkak të borës dhe stuhive të forta, ka patur edhe për banorët e fshatit Kolesjan. Ata kanë patur vështirësi edhe për të lëvizur në këmbë brenda fshatit.

Në vende të caktuara, bora e grumbulluar nga era ka kaluar trashësinë prej 2 metrash, duke vështirësuar edhe punën e OSHEE për riparimin e linjave të energjisë elektrike të dëmtuara nga stuhitë e erës. (A2 Televizion)